Coma na pignata scrussìa a beuj la ramin-a

Ëd cost mond falabrach, che da bon ancutì

Gnanca as n’antaja che già a-j rasato la schin-a

E sensa visché ‘l potagé a l’è già bele rustì.

Càmole, babòje e gate plose a rusio dësgenà

coj che ancor a vardo j’arsivòli sle muraje;

tante cros l’han ambrassà pòvri diav e disperà,

ma la stòria belavans gnente a l’ha mostraje.

Dë ‘dnans a costa preuva ch’a fiaca j’òss

toma l’umanità a mostra ‘l pes ch’a sa fé

con ij bon ch’as na van e an resto ij balòss

semù coma Baraba da chi a sa mach crijé.

Sfaragià la colomba a së sbanata sercand

un leu sicur anté posé soa santa ramuliva,

ma coma ai temp ëd pare Noé, a sà nen quand

ch’a trovà dla tèra arsanìa la bon-a riva.

E antant ch’as vàita ‘d tomé a lòn ch’a l’era

già pronta l’è la gent a prest ël mal dësmentié,

dòp Natal a-i é Pasca, ma sensa fé la fèra,

da frem ant ëca, sle malfàite a sarìa bel medité.

Bussolin, ai doi d’avril 2021

Michel dij Bonavé

(dij Barbisin ëd Gamababòsch)

GUARDANDO NELL’UOVO – Come un recipiente di terracotta incrinata bolle la pentola / di questo mondo sciocco, che da buon rimbambito / neppure s’accorge che già gli abbrustoliscono la schiena / e senza accendere la stufa è già del tutto arrostito. // Tarli, insetti e bruchi pelosi rodono disinvolti / quelli che ancora seguono sui muri le fantasticherie; / tante croci hanno abbracciato miserabili e disperati, / ma la storia purtroppo non gli ha insegnato nulla. // Davanti a questa prova che fiacca le ossa / di nuovo l’umanità mostra il peggio che sa fare / con i buoni che se ne vanno e ci restano i furfanti / scelti come Barabba da chi sa solamente gridare. // Spaventata la colomba annaspa cercando / un luogo sicuro dove posare il suo santo ramoscello d’ulivo, / ma come al tempo di padre Noè, non sa quando / troverà della terra risanata la buona sponda. // E mentre si attende di tornare a ciò che era / già pronta è la gente a dimenticare presto il male, / dopo Natale c’è Pasqua, ma senza fare cagnara, / da chiusi in casa, sarebbe bello meditare sulle malefatte.