La nostra rubrica “L'Angolo della Poesia” propone oggi la poesia in piemontese “L'autin ëd papà” di Gigi Vaira, curatore del blog personale “Emozioni di carta”.

L'autin ëd papà

Ël feu a l'ha ës-ciancà la téra a le ronse dla colin-a

e tanti colp ëd sapa a l'han faje pòst ai neuv filagn,

an manera che magara un di cola vigna rancin-a

a peussa regalé quaicòs, miraco dòp tanti agn,

ma l'òm as fà corage, a l'é pa 'l temp ch'a-j manca,

cole vis a son n'ardità ch'a veul lasseje ai fieuj

un leu për arcordeje che se 'l travaj a stanca

lë spetacol ëd la vigna ch'an nass ëdnans a j'euj

mai gnun sòld a podrà paghene 'l pressi,

a l'é un miràcol che minca di an ëncanta,

pòch për vòlta coj filagn a son pì nen j'istessi

e come un pare, per na fija ch'as fà 'nciarmanta,

is taca a vnì gelos ëd chi ch' a-j campa là në sguard,

pensand fin-a d'avertilo ch'a deuv ëstess-ne bin lontan

për tant ch'as renda cont, prima ch'a sia tròp tard,

che 'l padron d'autin a l'é lì, con la sapa an man,

precis a un pare ch'a sta a l'avàit për difende ij  fieuj.

Ma quand che da lògn as veddo ij lòsn, as sento ij tron

e le nivole nèire e basse a-j rivo dnans a j'euj

torzind-se e 'ngarbojand-se për fé pì tanta confusion

fin-a ël sol as na va via për nen vëdde 'l ravagi

dla tempesta, che con ij sò projètij ëd giassa

ëd feuje e rape mure a fà torna un gran carnagi;

le vis a sagno e a l'han na frèid ch'a-j massa.

Dòp des minute, l'orissi a l'ha dëscarià tut sò fardel,

ël sol a fà babòja, ël vent as chita e artorna sclint 'l cel.

Ant ij filagn col pare, con la schin-a marsa 'd pieuva,

a varda lòn ch'a-j resta… an sla front na rupia neuva.

Luigi Lorenzo Vaira è nato il 30 aprile 1960 a Sommariva del Bosco (CN) ove ancora oggi vive con la famiglia. La sua lingua madre è il piemontese, idioma in cui, come ama lui stesso sottolineare, pensa e addirittura sogna. Negli ultimi dieci anni si è cimentato nella scrittura di poesie e racconti rigorosamente in piemontese, aggiudicandosi il podio di concorsi letterari organizzati a livello regionale e nazionale.

In italiano ha scritto anche due romanzi: "Nemico Blu" e "P di Pum" dal quale è stato tratto un musical portato in scena nel 2016.

Luis Lorens Vaira a l'é nassù ai 30 d'Avril dël 1960 a Somariva dël Bòsch (CN) pais anté che 'ncora adess a viv con la famija. Soa lenga genita a l'é 'l piemontèis, parlada che, coma ch'a-j pias sotligné, a lo compagna minca di 'nt ij sò pensé e adritura 'nt ij seugn ëd le neuit. Ant j'ùltim des ani a l’é campasse a scrive 'd pròse e 'd poesìe, sèmper an piemontèis, rivand da soens ai primi pòst ëd vàire concors leterari organisà a livel regional e nassional.

An lenga italian-a a l'ha scrit doi romanz: "Nemico Blu" e "P di Pum" dont a l'é stàit gavà në spetàcol musical ch'a l'é 'ndàit an sena 'nt l'ann 2016.